Snýtt og skyrpt

"Hve lengi eigum við sem eigum um sárt að binda í sálinni að þurfa að berjast áfram á blóðugum hnúunum ?" spurði ég félagsmálaráðherra

"Hve lengi eigum við sem eigum um sárt að binda í sálinni að þurfa að berjast áfram á blóðugum hnúunum ?" spurði ég félagsmálaráðherra titrandi röddu á fundinum í gær.

Kl 20 í gærkvöldi var haldinn stjórnmálafundur hér á Ísafirði þar sem fulltrúar flokkanna í framboði héldu framsögur og svöruðu fyrirspurnum úr sal. Byrjað var á framsögunum, þar töluðu Birna Lár fyrir xD, Jóna Ben fyrir xV, Pálína Vagns fyrir xÍ, Guðbjartur Valdimars fyrir xS, Svanlaug fyrir xB og Kristinn H fyrir xF. Flestir stóðu sig vel sem ræðumenn en ræðurnar einkenndust þó af skítkasti yfir á hina flokkana. Nema reyndar hjá Pálínu sem var frekar á jákvæðu nótunum. Ég heyrði nú ekkert nýtt koma fram á fundinum. Undanfarið hef ég legið á netinu við lestur bloggsíðna, heimasíðna flokkanna og horft á flesta þá kosningaþætti sem hafa verið í sjónvarpinu. Það sem ég heyri og sé er mestallt loforð og skítkast. Hvorugt hefur hjálpað mér mikið við að ákveða hvaða flokkur eigi skilið mitt atkvæði.

Anyway, ég mætti sem sagt galvösk á fundinn með það í huga að hlusta með opnum huga á framsögumenn og jafnvel, í pissupásunni, að hitta á starfandi félagmálaráðherra, Magnús Stefánsson sem situr í 1. sæti á lista xB í NV. Ætlaði að ræða við hann um Sólstafi Vestfjarða, systursamtök Stígamóta, sem við gellurnar höfum verið reyna að koma á fót hér.

Nei, Harpa litla með ópalhjartað tók sig til og kom með fyrirspurn til hans á fundinum sjálfum. Nötrandi tók ég við hljóðnemanum byrjaði á því að kynna mig; "Harpa heiti ég og er þolandi kynferðisofbeldis....og ég er svolítið stressuð...."(aaaaarrrrg! svona segir maður ekki!!!).

Sagði ég frá því að með aðstoð fyrirtækja og einstaklinga á Vestfjörðum værum við hjá Sólstöfum Vestfjarða að reyna að koma á fót ráðgjafaþjónustu fyrir þolendur kynferðisofbeldis. Einu úrræðin sem hér væru er að fara til sálfræðings(karlmanns, sem oft er mjög erfitt fyrir konur sem karla sem lent hafa orðið fyrir kynferðislegu ofbeldi) á 3 vikna fresti og borga morðfjár fyrir, og jafnvel á 9-12 vikna fresti þegar veður er vont. Nei, takk.

Ég lauk fyrirspurninni á því að segja með kökkinn í hálsinum " hve lengi eigum við sem eigum um sárt að binda í sálinni að þurfa berjast áfram á blóðugum hnúunum?". Svo beyglaðist ég niður í stólinn andstutt og gráti nær. Á KOSNINGAFUNDI!!!!!! Andsk, helv, djö...hvað ég þoli ekki mitt litla viðkvæma hjarta. Pottþétt að ég er ekki á leið í pólitík.....Ímyndið ykkur mig á Alþingi, grátandi í pontu....eldrauð í framan og með suðurlandsskjálftann í beinum ?

Flokkur: Bloggar | 4.5.2007 | 12:45 | Facebook

Athugasemdir

Stóðst þig eins og hetja! Það þarf mikið hugrekki til að standa upp og segja hlutina eins og þeir eru. Til hamingju.

Halldóra Halldórsdóttir, 4.5.2007 kl. 13:11

Átt alla mína virðingu fyrir að þora og gera...fékkstu einhver vitræn svör?

Georg P Sveinbjörnsson, 4.5.2007 kl. 17:02

Mér þykir þú nú samt helvíti hugrökk þrátt fyrir ópalhjartað;-) En hverju svaraði kallinn?????

Ágústa (IP-tala skráð) 4.5.2007 kl. 21:38

Hann svaraði því bara að verið væri að vinna í því að fá Stígamótakonur hingað vestur reglulega. Sem er náttúrulega frábært, en það yrði nú ekki á við það að hafa ráðgjafaþjónustu Á SVÆÐINU ALLTAF.

Ég beindi fyrirspurn minni til Magnúsar en þó kusu allir að svara mér. Þetta var eina fyrirspurnin sem allir voru sammála um að væri mikilægt væri að bæta úr en svar Guðbjartar Valdimarssonar, xS, svaraði þó best að mínu mati. Hann nefndi það nú væri verið að senda fólk suður til þess að leita ráðgjafar, en það gengi engan veginn lengur og því yrði að vera þjónusta hér á staðnum. Hann orðaði þetta miklu betur en ég hér....

Einar, xD, svaraði afskaplega fallega en ekki jafnvel og Guðbjartur. Pálína Vagns sagðist hafa fylgst með baráttu okkar Sólstafakvenna og ættum við allan hennar stuðning.

Harpa Oddbjörnsdóttir (IP-tala skráð) 4.5.2007 kl. 23:01

Ég tek ofan fyrir þér fyrir þetta hugrekki þitt. Ég er viss um að með þessu er tekið skref til útbóta fyrir vestan.

Gott að heyra að félagsmálaráðherra er að vinna í málinu með Stígamótum. Eg ég þekki hann rétt verður árangur af því. Það er skref í áttina að fá viðvarandi ráðgjafaþjónustu hvarvetna um landið. Ekki veitir af.

Hallur Magnússon, 5.5.2007 kl. 14:05

þú þekkir mig ekkert en eg rakst á þessu færslu á netinu og þu átt heiður skilið fyrir það eitt að segjast vera þolandi innan um hóp af fólki því það eru ekki margar sem gætu gert slikt hið sama..og það er náttturlega frábært að það sé verið að vinna í þessu.

þú átt skilið eitt stórt klapp fyrir að spyrja þessa spurningu á kosningarfundi...

þvi þetta er jú eitt baráttumal að minu mati

Guðrún (IP-tala skráð) 5.5.2007 kl. 15:06

Ekkert að því að hiksta og stama, roðna og blána. Þurfti mikinn kjark til að bera upp erindið. Það er hætt við því að einhverjir eigi eftir að hiksta, stama, roðna og blána vegna þess að ekki er neitt gert til þess að taka virkilega á þeim málum sem úrræða krefjast - þolendur kynferðisofbeldis sem og ofbeldis almennt. Þarf að beina Kastljósinu og Kompás betur að þessu. Gangi ykkur vel með þetta.

vcd

Bragi Þór Thoroddsen, 5.5.2007 kl. 17:38